(不寄出的email)
老婆
你個老公又發功...我打咗出嚟係做記錄,唔好話我無講過,亦唔好事後誤解/增減我的意思.亦係我們婚姻生活的一個日誌.
愛一個人
我一直相信/以為愛一個人就會為他做許多事情,希望對方開心,有時就會放低自己一點;幸福是要爭取,但手法要高明,不可以要求別人付出多多自己付出少少就以為自己好慘,我也不是說自己偉大,我對你係真心,但我有時會覺得畀個良心都無正面反應, 反而輕易的講: 唔見我, 叫我走, 離婚等等, 你可會為你說過的事向我Say Sorry?
雖云愛一個人是不應該勉強佢係改變,但看到身邊人有問題,我無理由唔出聲! 你見到我做得唔啱你都會即刻出聲啦. 所以我千方百計希望你好.
待人態度
阿女生日我一叫, 我的"大人家人"全都來了,大家都係想替阿女開心,但中途你又走開咗唔等人,別人會感覺得到你的態度. 點解我的姑姐/父母會經常去探阿女表姐表哥而少探我哋呢? 難道阿女得罪了他們, 所以他們一齊唔錫佢? 難道他們一齊由鍾意見小朋友變到唔鍾意見小朋友?
我阿爸阿媽兩個生日食飯你都唔出席,你又點會預期他們在你生日會有什麽表示? 畀著係你, 你生日請咗人但那個人唔出席,亦無解釋,你都唔高興啦.
你想別人對自己好,就先要對人好呢句金科玉律, 你都聽過啦, 當你見到人時就不要擺出一副冷漠的態度,用身份或名去叫每一個人比人和只簡單對講聲Hi, 前者的感覺是受尊重得多了.
主動與被動
別人不約也可以主動約, 社會就是需要一些主動的人. 我開始識你的時候我覺得你係D 行動型主動型的人, 這種態度同性格如果用來發展人際關係, 相信你會覺得好多人錫你.
你生阿女時, Jenny無去醫院探你,所以你話你亦不打算去醫院探佢,我就不是這樣看,主動去探吓朋友, 友情先可以KEEP住,你明白這個道理嗎?
你不是沒有對我屋企人好,但我希望你可以開放多一點,可以主動一點,多些就人,別人也樣會就你. 你想人嚟呢頭食,你想夾份都無問題,但我不會一刀切說以後都唔請別人食飯/送禮,這不是我家的Practice,也不是社會的practice,人在社會要跟社會的習慣做事,否則只會到處撞板,覺得別人唔重視自己,但其實係自己不重視別人的習慣.
報答
如果你認為你幫手照顧Emma幾個下午, 計埋都唔夠廿四小時, 你就可以接受你家姐(家庭月入少過我們),請我們食一餐大家樂($100),那我父母養了我卅年, 呢幾年買樓,到宜家我(當全部都係我借)欠他們六位數字,你覺得佢哋可以接受我請幾多餐飯呢?
人送一件衫給阿女你都識送返D 嘢畀人啦,價值不需要一樣,但個心意要有囉.凡事AA制好象好公平,但感覺好差囉. 事實, 我強調事實上, 不是次次都我請, 請得最多係我父母,其次係姐夫,我同你係請得最少.
又講,你同女朋友們"Pot Luck", 又是否味味餸一樣價值呢? 一樣功夫去烹? 又是否次次出街去"中立場"呢? 一人出一次場地(即係包埋事後收拾的功夫), 你咪樣樣都一樣先叫AA? 你係咪覺得你D ladies night安排好正常, 好合理呢? 咁點解你覺得我做得唔啱呢?
女兒的活動
你說想多周末多些親子活動, 現在沒有嗎? 上星期不是去了中環? 之前不是經常去沙灘? 公園, 圖書館? 我踢波的時間都留返畀女了....我不認為我同女兒相處得不夠或有很大問題.
阿女固然要同小朋友玩, 但也要學識和不同年紀/性格的人相處, 我同CHESTER都有提到你希望的是一家三口的活動,我希望還可以多些甘家各人也可參與的活動,為此分別多次鬧交,其實有其他大人出席的活動, 你從另一個角度看就是我們可以休息的時間, 好像星期六我們"終於可以拍拖", 又就好像爺爺幫手帶阿女返學, 令你有時間睡覺, 我又不會遲到,有時仲慳咗小巴錢添...這些"外力"多加善用對我們身心是有正面的幫助. 但當然我們也不應視之為理所當然,要識得感謝.
我家各人與我的成長
我的二叔婆過身我最覺得可惜的除了她的馬豆糕,我也覺得沒有機會再聽她講不同家庭遇過的問題, 不同人心中的想法, 解決問題的方法, 當然我實例我講不出, 但咁多年來聽聽埋埋她和你奶奶傾這些話題, 係好影響我對"家庭/婚姻"的觀念, 更會識得從太太媽媽們的角度看事物, 對太太多點忍讓愛錫, 這也是你覺得我遷就到你的部份原因. 或者你眼中奶奶仍然不是好人, 但事實上很多人會搵佢傾偈, 講自己的問題, 問佢意見(不只是樓市方面), 所以我也從她口中學了不少. 你也知道我以前成日同女仔傾電話,就是這種近朱者亦的效果.
想見父母同Mommy's boy係兩回事, 我又不是凡事都聽她講,我聽你講仲多過聽佢講啦,只不過你視之為"必然",當我聽佢意見時你就覺得"主權"受損,但其實,你是沒有我的主權的,我只是扮你的"子民",我也有主見的.
其實你想想,我的家人有不同行業,不同經驗,阿女和他們交流學的東西會不會比只由我兩識的多?學識上的東西可以係學校學,但"通識"的東西就需要係生活之中學習,你也講過喜歡和年紀大過自己的人交談, 但別人的想法一定會和自己的睇法有不同, 你聽得多就會選擇啱自己的部份,
對與錯
我不會計較誰作主動,不會執著別人的缺失,人誰無過?你不高興大可以開心見誠講出來,但不要每次都將不同意見指成"都是你的錯"好嗎?
你自己知自己難頂就改吓啦, 何必令你身邊人suffer呢? 每頂你九次第十次我都會反彈一下, 雖則夫妻之間吵鬧係必然, 但有些吵鬧其實可以避免的, 你想有個更開心完整的家, 你也是要做些事情的.
家用
家用"不足",老婆出錢,坦白講係好common,正如今晚所講,結婚時,我月入仲少過宜家.
又咁講, 你話女兒返學後家用"不足"嘛, 咁即係女兒令你唔夠錢洗啦? 一你可以畀佢讀平D架, 二, 你諗吓呢D 錢係你為女兒出的, 你這樣愛女兒你不是不願意吧?
你一方面,講到我咁唔錫阿女, 你咁錫佢, 但你又只需出$1000就令佢讀到你心儀的糼稚園不是好抵嗎? 宜家仲唔洗畀校車添! 超值.....
將來的你
你太以女兒為中心,除了令我吃醋以外,我覺得你失去咗自我,無自己(阿女以外的)目標,阿女大咗自立多咗, 對你的需要少咗, 你就會覺得自己無咗價值, 無咗朋友, 你本身自信心已經唔係高,到時你會好失落, 到時我就好頭痕.
總結
唔知你會唔會睇到呢度,但我想講,我們的婚姻是一世的,我們要互相遷就,不要故意傷害對方,尊重對方的意願. Thank you for your cooperation.
P.S. 你可以forward呢封"鬧你"的email畀人睇吓你老公點衰, 但唔好口述, 別人就不能原汁原味理解你的苦況.
老公上
